Ætla at byggja støð til 30.000 migrantar í Guantánamo

Amerikanski forsetin, Donald Trump, gav í gjár boð um, USA skal gera eina risastóra støð til migrantar á herflotastøðini Guantánamo Bay í Kuba.

Ætlanin er, at pláss skal vera fyri 30.000 migrantum, sum verða útvístir úr USA.

Sum er, hevur USA eina støð til migrantar, sum eru bjargaðir úr sjónum á Guantánamo Bay. Hon er beint við gitna fongslið, har serliga altjóða yvirgangsfólk hava sitið. 

Til tey mest kriminellu

Trump segði í gjárkvøldið, at Guantánamo Bay skal brúkast til tey mest kriminellu, sum hótta amerikanska fólkið.

- Nøkur av teimum eru so ónd, at vit heldur ikki hava álit á heimlandi teirra, tí tey vilja ikki hava tey aftur, segði Trump sambært The Guardian. 

Boðini frá Trump í gjár eru enn eitt stig á leiðini til at halda eitt av stóru vallyftunum, sum var at senda milliónir av tilflytarum av landinum aftur.