Biden: Eiga ikki at gloyma álopið á Kongressina

Donald Trump hevur givið lyfti um, at fleiri av teimum, sum sita í fongsli eftir álopið á Kongressina í 2021, skulu fáa grið

Frá álopinum á Kongressina 6. januar 2021.

Mynd: AFP/Ritzau Scanpix

Emil Lisberg Jacobsen

06.01.2025 - 09:23

Fráfarandi forsetin í USA, Joe Biden, heitir nú á amerikanarar um ikki at gloyma tað, sum hendi í Kongressini í Washington DC 6. januar í 2021.

Í eini grein í Washington Post skrivar forsetin, at USA sum tjóð hevur eina kollektiva ábyrgd at minnast tað, sum hendi hendan dagin.

"Vit kunnu ikki góðtaka eina endurtøku av tí, sum hendi fyri fýra árum síðan," skrivar Joe Biden í greinini, sum varð almannakunngjørd í gjár.

Joe Biden

Joe Biden, forseti. (Mynd: AFP/Ritzau Scanpix)

Joe Biden hevur í fleiri førum sagt, at Donald Trump er ein hóttan móti demokratinum, og hann hevur víst á tað, at Trump ikki vildi viðurkenna valúrslitið í 2020, sum prógv fyri hesum.

Donald Trump hevur givið lyfti um, at fleiri av teimum, sum sita í fongsli eftir álopið á Kongressina í 2021, skulu fáa grið. Millum hesi eru fólk, sum eru dømd fyri at hava lopið á løgreglufólk, skrivar Reuters.