Ókeypis sálarfrøði til børn hevur ikki undirtøku í trivnaðarnevndini

Uppskotið til samytyktar hjá Miðflokkinum um ókeypis sálarfrøði til børn til og við 14 ár eigur ongan góðan í trivnaðarnevndini hjá løgtinginum.

Nú fáa fólk millum 15 og 25 ár, sum hava angist ella lætt til moderat tunglyndi, ókeypis sálarfrøði.

Heilsutrygd rindar fult gjald upp til 12 viðgerðir. 

Hetta skal eisini vera galdandi fyri tey, sum eru 14 ár ella yngri, heldur Miðflokkurin.

Men tað halda hinir flokkarnir ikki.

Løgtingið 2023, Jenis av Rana, Steffan Klein Poulsen, MIðflokkurin

Miðflokkamenninir Steffan Klein Poulsen og Jenis av Rana. (Mynd: Bjarni Árting Rubeksen)

Tey flestu mæla frá

Nevndin sigur, at tey flestu, sum eru hoyrd, mæla frá at geva børnum viðgerð einsamøll. 

Er neyðugt við viðgerð, eigur hon at vera givin barninum saman við foreldrunum, sigur nevndin. 

Hon nevnir eina royndarverkætlan í Vágum, sum Undirvísingarstýrið og kommunurnar í Vágum gera.

Í verkætlanini eru allir partar, skúlar, ansingarstovnar, heilsufrøðingar og so framvegis í einum átaki at kunna um, hvussu sálarligar avbjóðingar kunnu síggjast og handfarast.  

Eru úrslitini góð, kann hetta verða gjørt í øllum landinum eftir royndartíðina, heldur nevndin.

Trivnaðarnevndin mælir til, at landsstýrið hevur eitt vakið eyga á hesum øki, og har tað ber til at gera neyðug átøk.