Her er semjuskjalið um Suðuroyartunnilin

Allir seks flokkar á løgtingi eru samdir um at fara undir Suðuroyartunnilin.

Semjuskjalið um tunnilsverkætlanina varð undirskrivað fyrrapartin.

Sambært semjuni skal løgtingið í fyrstu syftu taka støðu til, at verkætlanin verður fyrireikað, prosjekterað og bjóðað út, soleiðis at neyvari kostnaðarmeting og detailprosjektering eru klár, áðrenn endalig politisk avgerð verður tikin um at fremja verkætlanina.

Roknað verður við, at hetta arbeiðið tekur eitt ár, frá tí at løgtingið hevur samtykt tað. 

Tað verður almenna partafelagið, P/F Suðuroyartunnilin, sum kemur at standa fyri samlaðu verkætlanini.

Les semjuskjalið her.

Landsverk skal góðkenna

Sambært semjuskjalinum skal verkætlanin góðkennast av Landsverk, áðrenn verkætlanin verður boðin út. Eisini skal Landsverk hava eftirlit við verkætlanini.

Tá alt fyrireikingararbeiðið er gjørt, verður sjálvt arbeiðið bjóðað út. Tá tilboðini eru innkomin, og neyvi prísurin fyri tunnilin er kendur, skal løgtingið aftur taka støðu til málið. Tað verður í 2026.

Tá skal politisk støða takast til tunnilsverkætlanina við serstakari løgtingslóg, sigur semjuskjalið.

Higartil eru brúktar umleið 20 milliónir krónur til forkanningar og fyrireikingar.

Á fíggjarlógini fyri næsta ár verða 100 milliónir krónur settar av til Suðuroyartunnilin, og aðrar 100 milliónir verða settar av á fíggjarlógini fyri 2026.

Hetta eru pengarnir, ið verða settir av, áðrenn løgtingið skal taka endaliga støðu til stóru tunnilsverkætlanina, eftir ætlan í 2026.

Landið játtar eina milliard

Sambært framløguni hjá løgmanni fyrrapartin skal landskassin seta tilsamans eina milliard krónur í Suðuroyartunnilin - 100 milliónir um árið í 10 ár.

Íleggingargrunnurin skal veita tunnilsfelagnum eitt rentu- og avdráttarfrítt lán uppá 350 milliónir krónur.

Og síðani skal tunnilsfelagið læna restina av tí, sum tunnilin kostar. 
 

Meiri verður at frætta í útvarpstíðindunum á middegi.

Myndir: Bjarni Árting Rubeksen

Semjuskjal um Suðuroyartunnilin, Suðuroyartunnilin, Aksel V. Johannesen

Suðuroyartunnil og semjuskjal, Teitur Samuelsen

Suðuroyartunnil og semjuskjal, Bjarni Johansen

Semjuskjal um Suðuroyartunnilin, Suðuroyartunnilin

Semjuskjal um Suðuroyartunnilin, Suðuroyartunnilin