Sakførari: Aðalráðið má rinda endurgjald til uppsagda undirvísingarstjóran

Broytir Barna- og útbúgvingarmálaráðið ikki sína avgerð, má tað sjálvt taka ábyrgd fyri og rinda endurgjald til uppsagda undirvísingarstjóran á Glasi, Elsu Mariu Holm Olsen. 

Tað sigur Gunn Ellefsen, sakførari hjá Unu Joensen, rektara, í sínum hoyringarsvari til ætlanarskrivið hjá ráðnum um at standa við avgerðina at ógilda uppsøgnina. 

- Endurgjaldskravið kann fara upp um eina millión krónur, metir Gunn Ellefsen.

Una Joensen, trappuverkfall á Glasi, næmingar á Glasi, Glasir,

Frítekst tagging: 

Una Joensen rektari á Glasi

Trappuverkfall á Glasi

Næmingar á Glasi

Glasir

Una Joensen er rektari á Glasi. (Mynd: Bjarni Árting Rubeksen)

Glasir ikki partur av málinum

Glasir er ikki partur í málinum um uppsøgnina av Elsu Mariu Holm Olsen, útbúgvingarstjóra, og skal tí bara gera, sum yvirskipaði myndugleikin, Barna- og útbúgvingarmálaráðið, sigur. 

Tað skrivar Jógvan Elias Winther Poulsen, sakførari hjá Elsu Mariu Holm Olsen, millum annað í sínum síðsta hoyringarskrivi í málinum. Hann vísir til Christian Andreasen, sum gjørdi eina óhefta frágreiðing av málinum fyri Barna- og útbúgvingarmálaráðið, sum eisini segði, at Glasir ikki er beinleiðis partur í málinum.

Men tað er Glasir, sum sleppur at rinda uppsagda undirvísingarstjóranum endurgjald, um hon fær viðhald, og tað er stovnurin ikki sinnaður at gera, tí tað er Barna- og útbúgvingarmálaráðið, sum hevur gjørt ein feil.

Elsa Maria Holm Olsen

Elsa Maria Holm Olsen, sum er søgd upp sum útbúgvingarstjóri á Glasi.

Vart í meira enn eitt ár

Uppsagnarmálið av undirvísingarstjóranum á Glasi hevur nú vart í meiri enn eitt ár, og endurgjaldskravið verður at rokna fra 1. september í 2023, sambært sakføraranum hjá Elsu Mariu Holm Olsen, stendur í hoyringarsvarinum hjá rektaranum á Glasi.

Hoyringarsvarið er gjørt í sambandi við ætlanarskrivið hjá Barna- og útbúgvingarmálaráðnum um at standa við avgerðina at ógilda uppsøgnina av útbúgvingarstjóranum. 

Gunn Ellefsen, 16:9

Gunn Ellefsen er sakførari hjá Unu Joensen, rektara. (Mynd: Bjarni Árting Rubeksen)

Kravið er 741.000 kr. 

Sambært sakføraranum hjá Unu Joensen hava tey fingið upplýst, at kravið er 741.467 krónur at rokna frá september í 2023 til juli í ár - 67.406 krónur um mánaðin við eftirløn

Men málið gongur enn, og verður úbúgvingarstjórin settur aftur, kemur upphæddin upp á 1,2 milliónir sigur Gunn Ellefsen í sínum svari - hetta tí enn ein uppsagnartíð má roknast uppí, tí starvið ikki er til longur. 

Hon endar sítt hoyringarsvar við at siga, at broytir Barna- og útbúgvingarmálaráðið ikki sína avgerð um at halda fast við upprunaligu avgerðina at ógilda uppsøgnina av Elsu Mariu Holm Olsen, má ráðið taka fulla ábyrgd fyri málinum - harundir at samráðast um og rinda Elsu Mariu Holm Olsen eitt møguligt endurgjald. 

Jógvan Elias Ellefsen

Jógvan Elias Winther Poulsen er sakførari hjá Elsu Mariu Holm Olsen. (Mynd: Bjarni Árting Rubeksen)

Aðalráðið gjørdi ein feil

Barna- og útbúgvingarmálaráðið læt gera eina óhefta kanning av málinum, og í kanningini verður staðfest, at Barna- og útbúgvingarmálaráðið hevur gjørt ein feil í viðgerðini av kæruni, sum byggir á skeiv fakta.

Orsakað av atliti at borgaranum og at Glasir ikki er beinleiðis partur í málinum, var tilmælið, at avgerðin skuldi standa við, hóast tað var staðfest, at feilir vóru í viðgerðini. 

Men tað er feilurin hjá Barna-og útbúgvingarmálaráðnum og tí ikki Glasir, men ráðið, sum má rinda endurgjald til uppsagda útbúgvingarstjóran, um tey standa við sína avgerð, heldur sakførarin hjá Unu Joensen, rektara.