Raðfesta at fáa dagstovnin lidnan skjótast til ber

Vantandi tilrættislegging, sum nú kostar kommunukassanum dýrt.

Tað sigur Anniku Olsen úr Tjóðveldi, nú meirilutin í Tórshavnar býráð vil byggja uppí ein dagstovn í býnum fyri methøgan fermetraprís, og uttan at arbeiðið er bjóðað alment út.

Dagstovnurin "Hans Andrias Djurhuus", sum er í Hans Andriasar gøtu við Landavegin í Havn, er í dag 763 fermetrar til støddar. Byggjast skulu 357 fermetrar aftrat. 

Við útbyggingini verður stovnurin víðkaður úr tveimum upp í tríggjar vøggustovu- og barnagarðsstovur. Tað gevur pláss fyri tilsamans 90 børnum, 30 fleiri enn í dag. 

Løgtingið 2023, Annika Olsen

Annika Olsen, býráðslimur í Tjóðveldi. (Mynd: Bjarni Árting Rubeksen)

Articon fær arbeiðið

Arbeiðið er ikki bjóðað alment út, í staðin hevur kommunan tikið av einum tilboði frá Articon, sum vil gera arbeiðið fyri 15 milliónir krónur. Arbeiðið skal vera liðugt í september í ár.

Sambært gerðabókini hjá Tórshavnar kommunu verður samlaði kostnaðurin - við byggiharraútreiðslum og tí meirvirðisgjaldi, sum kommunan skal gjalda - tilsamans 18,6 milliónir krónur.

Tað merkir, at fermetraprísurin fyri teir 357 fermetrarnar, sum skulu byggjast afturat, er 52.100 krónur.

Á býráðsfundinum hóskvøldið samtykti meirilutin at játta 17 milliónir krónur til verkætlanina. 

Hoyr ljóðbrot við Anniku Olsen her:

Heðin Mortensen, kommunuval 2020, uppteljing

Heðin Mortensen, borgarstjóri. (Mynd: Bjarni Árting Rubeksen)

Heðin Mortensen, borgarstjóri, sigur, at tað hevur hægstu raðfesting at fáa dagstovnin lidnan skjótast tilber. 

Hoyr samrøðu við Heðin Mortensen í útvarpstíðindunum: