H71 og KÍF spældu seg í finaluna

Tað verða H71 og KÍF, sum bresta saman í steypafinaluni í manshondbólti.

Hoyvíkingar vunnu 32-27 á heimavølli, eftir at fyrra hálvfinalan hóskvøldið endaði við javnleiki í Vestmanna. 

Seinni dysturin var javnur til tveir triðingar vóru spældir. Eftir hetta fór heimaliðið frá VÍF, sum var darvað av, at málverjin, Mladen Mjerimacka, sá út til at vera skaddur.

Í Kollafirði skuldi KÍF venda einum tveymálstapi ímóti StÍF, og tað eydnaðist til fulnar.

Eisini í hesum dystinum gekk javnt á leingi, og í steðginum var støðan 15-15. Fyrstu løtuna av seinna hálvleiki fekk heimaliðið fýra mál á rað, og hóast munurin minkaði niður aftur í tvey mál, megnaði StÍF ikki at fáa KÍF aftur, og síðstu løtuna vaks munurin upp í 31-22.

Hjá kvinnum spældu H71 og Kyndil seg í finaluna í gjár. Finalurnar vera spældar 25 februar.