Finalistarnir hjá monnum skulu finnast

Tvær spennandi hálvfinalur í steypakappingini í manshondbólti eru á skránni í dag, tí hóast fyrru hálvfinalurnar blivu spældar hóskvøldið, er einki avgjørt.

Seinnapartin í dag klokkan 16.00 tekur KÍF ímóti StÍF í Kollafirði, har kollfirðingar skulu royna at reisast aftur, eftir at teir í fyrru hálvfinaluni taptu við tveimum málum fyri strandingum.

Ikki verður tað minni spennandi í Hoyvíkshøllini klokkan 19.00, tá ið H71 tekur ímóti oddaliðnum í landskappingini, VÍF, tí fyrra hálvfinalan teirra millum í Vestmanna endaði við javnleiki.

Favorittarnir víðari hjá kvinnum

Hjá kvinnum gjørdist í gjárkvøldið greitt, at tað verða H71 og Kyndil, ið skulu spæla steypafinalurnar.

Hóast H71 tapti við einum máli fyri Neistanum, sum í Hoyvíkshøllini vann 29-28, broytti tað einki, tí H71 vann fyrru hálvfinaluna mikukvøldið við heili níggju málum.

Kyndil vann í gjár í høllini á Hálsi í Havn við trimum málum á Stjørnuni, 23-20, so talan gjørdist um greiðan samlaðan sigur til Kyndil, ið mikukvøldið vann við fýra málum norðuri í Klaksvík.