Sethúsaprísurin hækkaði í fjør, men nú eru fólk meira varin

Sethús í Føroyum kostaðu í miðal 2,6 milliónir kr. í fjør.

Í Havn kostaðu tey í miðal 3,9 milliónir, og í Klaksvík og í Eysturoynni ávikavist 2,8 og 2,1 millión kr.

Tað vísir ein greining, sum Betri Banki hevur gjørt.

Miðalprísurin í Havn hækkaði sjey prosent, og hækkingin fyri alt landið í fjør var 11 prosent samanborið við 2021.

Tó lækkaði miðalprísurin í ávísum økjum í landinum. Frá triðja til fjórða ársfjórðing lækkaði sethúsaprísurin í Havn í miðal níggju prosent.

Sethúsaprísir 2022

Eru meira varin

Betri Banki sigur, at hækkandi rentur og prísvøksturin gera, at fólk eru vorðin meira varin. 

Tað sæst aftur í talinum av sethúsasølum, sum í fjør var tað minsta í níggju ár.

Kára á Dunga, stjóri í Betri Heimi, sigur, at sethúsaprísirnir eru lækkaðir 5-10 prosent í ávísum pørtum av landinum seinna hálvár í fjør, og prísurin fer væntandi at lækka enn meira í ár.

Bústaðarbyrða 2022

Bústaðarbyrðan er vorðin tyngri

Bústaðarbyrðan í Føroyum í fjør var í miðal 22 prosent. Tað eru tvey prosentstig meira enn í 2021.

Bústaðarbyrðan lýsir, hvussu stóran part av inntøkuni eftir skatt eitt par við tveimum børnum undir sjey ár skal brúka at gjalda bústaðarlánið

Bústaðarbyrðan í Havn var 37 prosent í fjør, og tað eru trý prosentstig meira enn í fyrraárið.

Í Klaksvík og í Eysturoynni var bústaðarbyrðan ávíkavist 27 og 20 prosent í fjør,  ella ávikavist fimm og tvey prosentstig størri enn í 2021.