Stór mótmælisgonga framman fyri Christiansborg

Fólk í túsundatali fólk hava í dag mótmælt ætlanunum hjá donsku stjórnini at taka av dýra biðidag sum almennan frídag.

Stóra mótmælisgongan var framman fyri Christiansborg.

Tað er fakfelagssamstarvið 'Fagbevægelsens Hovedorganisation', sum skipar fyri mótmælistiltakinum, og sambært teimum vóru minst 50.000 fólk komin at mótmæla í dag.

Aftrat mótmælistiltakinum hevur fakfelagssamstarvið eisini skipað fyri undirskriftainnsavnan. Higartil hava fleiri enn 460.000 fólk skrivað undir mótmæli, sigur forkvinnan, Lizette Risgaard.

- Tilsamans vísir hetta, at stjórnin ikki hevur undirtøku fyri at taka av dýra biðidag, sigur hon við danska TV2. 

- Hetta eigur at gera, at stjórnin ásannar, eins og andstøðuflokkarnir, at dýri biðidagur ikki verður tikin av í bræði, sigur forkvinnan.

Uppskotið er lagt fyri Fólkatingið, men Lizette Risgaard heldur, at uppskotið skal takast aftur, og fakfeløgini heldur skuldu verið boðin til samráðingar.