Rúsdrekkaframleiðarar skulu sleppa at selja egnan løg

“Arbeitt verður við at broyta lógina soleiðis, at tit sleppa at selja tykkara egnu vørur,” lovaði Høgni Hoydal, landsstýrismaður í vinnumálum, tá hann klipti snórin til nýggja whiskydistillaríið hjá Faer Isles Distillery.

Tað var hátíðardámur í virkisbygninginum hjá Faer Isles Distillery í Vestmanna, tá Høgni Hoydal, landsstýrismaður klipti snórin til nýggja og stóra whisky-brennaríið hjá felagnum. 

Faer Isles Distillery, Høgni Hoydal

“Hetta er ein stórur dagur hjá tykkum, hjá Vestmanna og í føroyskari vinnulívssøgu,” segði Høgni Hoydal, áðrenn hann klipti snórin, og fyrstu, gyltu whisky-droparnir fóru at renna ígjøgnum brennaríið.

Høgni Hoydal lovaði eisini nýggju whisky-framleiðarunum, at hann fer at broyta lógina soleiðis, at teir skulu sleppa at selja sínar egnu vørur í umbygda og virkisbygninginum á bryggjuni í Vestmanna. 

Einki sterkari enn gulløl

Hetta hevur eisini verið eitt ynski hjá Einari Waag og Føroya Bjór, sum eisini framleiðir whisky og onnur sløg av rúsdrekka. 

Í løtuni sleppa øl- og drúsdrekkaframleiðarar ikki at selja løg, ið er sterkari enn tað, ið svarar til eina gulløl, ið er 5,6 prosent. 

Men nú er líkt til, at hetta verður broytt í hesi tingsetuni.

Whisky í Vestmanna, Faer Isles Distillery