Putin: Vesturheimurin ger kríggið í Ukraina verri

- Vesturheimurin ger kríggið í Ukraina verri, tí spælið er vandamikið, skitið og blóðugt.

Tað segði russiski forsetin, Vladimir Putin, tá hann helt røðu í gjárkvøldið, og síðani svaraði spurningum í hugsanarbankanum Valdai í Moskva.

Putin fanst at heimsskipanini, sum hevur verið og boðaði frá eini nýggjari heimsskipan, sum kemur.

Hann segði eisini, at Ukraina er eitt samansett land.

Vladimir Putin - Mynd: Ritzau Scanpix

(Mynd: Ritzau Scanpix)

Ikki fíggindi

Hóast nógvar atfinningar, so nevndi Vladimir Putin kortini, at Russland ikki er fíggindi hjá vesturheiminum, og at partarnir einaferð aftur mugu tosa saman.

- Eg kenni meg sannførdan um, at hóast heimurin verður býttur sundur av nýggjum, so verður neyðugt hjá vesturheiminum at tosa við okkum um okkara felags framtíð, tess fyrr, tess betri, segði hann.

Eygleiðarar siga ongan iva vera um, at Vladimir Putin vil hava, at Russland hevur ávirkan á viðurskiftini í grannalondunum. Ikki at Russland beinleiðis skal hava valdið, men at Russland skal vera við til at avgera framtíðina hjá londunum.

Og hann duldi heldur ikki fyri, at grannalondini hava týdning fyri Moskva.

Vil eisini stýra

Og eingin ivi er um, at Putin vil hava, at Moskva verður ein miðdepil í heiminum, so tað ikki bert er vesturheimurin, sum skal stýra øllum.

Vladimir Putin vil gera enda á skipanini, sum hevur verið galdandi, síðani kalda kríggið endaði, og vil hava størri ávirkan á viðurskiftini.