Italia fær sín fyrsta kvinnuliga forsætisráðharra

Nógv bendir á, at ytsti høgravongurin í Italia hevur vunnið tjóðartingsvalið í gjár, og at Italia fær sín fyrsta kvinnuliga forsætisráðharra.

Fyribils úrslit vísa, at samgongan við Giorgiu Meloni á odda fær 43 prosent av atkvøðunum, og hevur sostatt meiriluta í tinginum.

Høgrasamgongan fevnir um flokkin hjá Meloni, sum eitur Italsku brøðurnir,  Ligan og Framá Italia.

Flokkurin hjá Giorgiu Meloni, Italsku brøðurnir, fekk 27 prosent av atkvøðunum. 

Arbeiða fyri øll í landinum

Giorgia Meloni sigur, at hon ætlar at standa á odda fyri nýggju stjórnini í Italia, og at hon fer at arbeiða fyri øll í landinum.

- Fólkið í Italia er komið við greiðum boðskapi um, at tey vilja hava Italsku brøðurnar at leiða landið, segði Meloni í nátt.

Sosialdemokratiski PD-flokkurin viðurkennir, at hann hevur tapt valið. 

Silvio Berlusconi - Mynd: Ritzau Scanpix

Silvio Berlusconi, formaður í Framá Italia, á vali í gjár. Flokkur hansara er við í høgrasamgonguni, sum vann valið. (Mynd: Ritzau Scanpix)

Dapurt úrslit

- Hetta er eitt dapurt kvøld fyri landið, sigur Debora Serra-cchiani í PD-flokkinum í fyrstu viðmerking til valúrslitið, skrivar Reuters.

- Høgravongurin hevur meirilutan í tinginum, men ikki í landinum, sigur Debora Serra-cchiani.

Nú skal forsetin gera av, hvør fær møguleikan at skipa stjórn, men  lítil ivi er um, at talan verður um mest høgravendu stjórnina í Italia síðani seinna heimsbardaga.

Vallutøkan var óvanliga lítil, bara 64 prosent, skrivar BBC.