Almannaverkið hevur tørv á 50 starvsfólkum um árið

Higartil í ár hevur Almannaverkið havt 14 lýsingar, har 27 størv eru lýst leys.

Fyri 17 av størvunum er umsóknarfreistin ikki farin.

Fyri tey 10 størvini, har umsóknarfreistin er farin, er støðan, at í einum av størvunum er setanartilgongdin ikki liðug.

Fyri tvey av størvunum er lýsingin tikin aftur, tí umstøður eru broyttar. Fyri tvey av størvunum eru skikkaðir umsøkjarar settir í starv.

Og til fimm av størvunum kom eingin umsókn.

Tað upplýsir Sólvit Nolsø, landsstýrismaður í almannamálum, í svari til Beintu Løwe Jacobsen, tingkvinnu fyri Tjóðveldi, sum hevur spurt um starvsfólkatrotið í Almannaverkinum.

90 lýsingar um 175 størv

Seinna hálvár í fjør hevði Almannaverkið 90 lýsingar við 175 støvum, og av hesum var helvtin av størvunum sett.

Beinta Løwe spurdi, hvussu stórur metti tøvurin á starvsfólki er næstu árini. 

Landsstýrismaðurin svarar, at um virksemið á Almannaverkinum heldur fram sum nú, og við sama vøkstri í tørvi á tænastum, verður mett, at tørvur verður á 60-80 nýggjum starvsfólkum um árið komandi árini.

50 starvsfólk um árið

Almannaverkið veksur við 50 starvsfólkum um árið vísa miðaltøk seinastu fimm árini. Harafturat fara 20 - 30 starvsfólk frá fyri aldur um árið.

Tørvur er serliga á útbúnum starvsfólkum á øllum økjum hjá Almannaverkinum, eitt nú námsfrøðingum, sjúkrarøktarfrøðingum, sjúkrarøktarum, ergo- og fysioterapeutum og sosialráðgevum, sigur Sólvit Nolsø, landsstýrismaður, í svarinum.