Kina byggir ikki fleiri kolaverk uttanlands

Kina fer ikki at byggja fleiri kolaverk í útlandinum.

Tað segði kinesiski forsetin, tá hann helt røðu í ST í gjár. Boðini frá Xi Jinping fáa góða móttøku í USA.

- Vit hava tosað við Kina um júst hetta í eina tíð, og tí fegnast vit um, at kinesiski forsetin hevur tikið avgerðina, sigur John Kerry, sum er serligur sendimaður í veðurlagsviðurskiftum hjá amerikansku stjórnini.

Alok Sharma, sum skal standa á odda fyri veðurlagstoppfundinum hjá ST, Cop26, sum verður í Glasgow frá 31. oktober til 12. november, sigur seg eisini fegnast um kinesisku avgerðina.

- Tað er greitt, at atfinningar leingi hava verið at kolaverkum, og tí fegnist eg um, at Jinping hevur tikið avgerð um at gevast við at byggja slík verk uttanlands. Tað hava vit mangan umrøtt, tá eg havi vitjað í Kina, sigur Alok Sharma.