Putin vann valið: Kann sita til 2036

Russiski forsetin, Vladimir Putin, hevur vunnið fólkaatkvøðuna, sum kann tryggja honum valdið til 2036. Nú eru 99 prosent av atkvøðunum upptaldar.

Uppteljngin vísir, at 78 prosent av russarum hava atkvøtt fyri broytingini í grundlógini soleiðis, at tað ber til hjá Putin at sita sum forseti í 16 ár aftrat.

Samkynt hjúnalag verður bannað

Valluttøkan var 65 prosent, og sambært valnevndini, atkvøddu góð 21 prosent ímóti nýskipanini. 

Nýskipanin merkir millum annað, at Putin kann stilla uppaftur til forsetavalið tvær ferðir aftrat, og nógv hevur verið tosað um tað. 

Nýskipanin merkir eisini, at hjúnalag millum tvey av sama kyni verður bannað, pensjónsviðurskiftini batna, og Gud verður skrivaður inn í grundlógina.

Valskeiðini seks ár

67 ára gamli forsetin hevur sitið við valdinum sum forseti ella forsætisráðharri í meira enn 20 ár, og hann er sostatt tann forsetin, sum hevur sitið longst í Russlandi ella Sovjetsamveldinum síðani Josef Stalin.

Skeiðið hjá forsetanum nú er runnið 2024, men við broytingunum kann hann stilla uppaftur til tvey nýggj skeið, sum eru seks ár hvørt.

Ì seinastu talu síni áðrenn valhølini stongdu segði Putin, at fólkaatkvøðan snýr seg um støðufesti, trygd og ríkidømi.

Valnevndin: Reglurnar ikki hildnar

Broytingin í grundlógini er longu samtykt í Dumuni, men Putin hevur fyrr sagt, at úrslitini á fólkaatkvøðuni er avgerðandi fyri, at broytingarnar kunnu setast í verk.

Men reglurnar fyri, hvussu atkvøður verða upptaldar, eru ikki hildnar á fólkaatkvøðuni í Russlandi, upplýsir valnevndin í landinum, og atkvøðurnar eru tí ógildaðar.

Fleiri atkvøðuseðlar í einum valhøli í Moskva eru ógildaðir, skrivar russiska tíðindastovan Tass.

Brot á reglurnar avdúkaðar

Valnevndin í Ramenki-økinum í Moskva hevur sæð eina sjónbandaupptøku frá einum valhøli og hevur avdúkað brot á reglurnar um, hvussu fólk seta krossin og hvussu atkvøðurnar verða upptaldar.

– Talan er um 2.783 atkvøður, sum verða ógildaðar, sigur Aleksej Venediktov, formaður.

Andstøðuleiðarin, Aleksej Navalnyj, hevur mælt fólk frá at fara á val. Navalnyj sigur, at Putin vil verða forseti restina av ævi síni. 

– Úrslitini, sum eru kunngjørd, eru følsk og lygn. Tey umboða ikki tað, sum russiska fólkið heldur, sigur Navalnyj.