USA: Deyðatalið farið upp um 30.000

Næstan 5.000 fólk í USA eru deyð av koronavirusinum seinasta samdøgrið. Tøl frá John Hopkins-universitetinum vísa, at 4.852 fólk eru deyð, og tað er hægsta deyðatalið upp á 24 tímar í USA higartil.

Næstseinasta samdøgrið doyðu 2.384 fólk, so hækkingin er 103,5 prosent. Høga deyðatalið kann vera komið, tí New York City hevur uppmett tølini fyri fólk, sum eru deyð av koronavirusinum við 3.700, skrivar DR.

USA er tað landið í heiminum, har flest fólk eru deyð av COVID-19. Tilsamans eru 30.844 fólk deyð, og í løtuni eru umleið 638.000 smittað. Harafturat verður roknað við, at myrkatalið er stórt.

Onkrir statir lata upp aftur skjótt

Tað er serliga í New York City, at virusið ger um seg. Samstundis sigur Donald Trump, at USA hevur lagt tað ringasta afturum seg í stríðnum móti koronavirusinum, skrivar BBC.

Forsetin segði á tíðindafundi, at hann roknar við, at onkrir statir fara at lata upp aftur áðrenn apríl er liðin.

– Dáturnar benda á, at tað ringasta er av, tá tað snýr seg um nýggjar tilburðir. Vónandi heldur góða gongdin fram, segði Donald Trump á tíðindafundinum.

Trump: Onnur lond lúgva um tølini

Tá Donald Trump varð spurdur um, hví New York hevur so høg deyðatøl í mun til samlaða talið í heiminum, skuldsetti hann onnur lond fyri at lúgva um tølini. 

– Trýr nakar upp á tølini hjá nøkrum av hesum londunum, segði hann og nevndi Kina. 

Amerikanski forsetin, Donald Trump, segði eisini, at USA kannar møguleikan fyri, at koronavirusið kom úr eini royndarstovu í Wuhan heldur enn á einum djóramarknaði.