Øll koronasmittað í Grønlandi frísk aftur

Í Grønlandi er í løtuni ongin sjúkur av koronasmittu. Tað upplýsir koronasíðan hjá grønlendsku heilsumyndugleikunum.

11 fólk hava fingið staðfest covid-19 virusið í Grønlandi, men tey eru øll vorðin frísk aftur. Allir 11 tilburðirnir eru í høvuðstaðnum Nuuk.

Ongin persónur er staðfestur smittaður í Grønlandi síðani tann 4. apríl. Tilsamans eru 844 fólk kannað fyri koronasmittu í Grønlandi.

Hóast góðu gongdina í Grønlandi, halda myndugleikarnir fast í tiltøkunum, sum millum annað merkir, at øll ferðing í Grønlandi er frámæld, bæði innanlands og uttanlands. Hetta er fyribils galdandi til tann 30. apríl.

Frá 14. apríl verður tó stigvíst byrja aftur í skúlum og dagstovnum í øllum landinum uttan í Nuuk, har núverandi tiltøkini framvegis eru galdandi.

Har skúlar og dagstovnar byrjar aftur, skulu fólk framhaldandi halda seg til tilmælini um eitt nú frástøðu, í mesta lagi vera 10 fólk savnað á einum stað í senn, skrivar grønlendska kringvarpið KNR.