Sleppa ikki at taka støðu til dupultmandatið nú

Mánakvøldið verður býráðsfundur á Tvøroyri.

Men tað verður ikki nú mánakvøldið, at Kristin Michelsen skal taka støðu til, um hann vil vera borgarstjóri á Tvøroyri ella løgtingsmaður.

Tað vil meirilutin í býráðnum annars.

Mánakvøldið í hesari vikuni – tann 3. september - sendu Kristina Roest, Súsanna Bertholdsen, Bjarni Hammer og Bogi Johannesen bæði kommunustjóranum og borgarstjóranum ein teldupost.

Tey skriva soleiðis í teldupostinum:

"Á býráðsfundinum tann 13. februar 2017 varð loyvi givið Kristini Michelsen at vera borgarstjóri fulla tíð hjá Tvøroyrar kommunu, samstundis, sum hann situr sum løgtingslimur.

Meirilutin ynskir at taka málið uppaftur til nýggja viðgerð. Hetta skal vera á fyrst komandi býráðsfundi."

Rúgvismikil skrá

Og fyrst komandi býráðsfundur er nú mánakvøldið. Men málið er ikki á skrá.

Kommunustjórin Jónleyg Jespersen Bech sigur, at tað er borgarstjórin, sum setur mál á skrá til býráðsfundir, og hon vísir annars til borgarstjóran Kristin Michelsen.

Og Kristin Michelsen sigur, at skráin til býráðsfundin mánakvøldið er so rúgvismikil, at tað er ikki pláss fyri málinum um hansara dupultmandat.

Býráðsfundurin á Tvøroyri plagar at vera klokkan fimm, men mánakvøldið verður hann klokkan sjey.

Orsøkin er, at Føroyanevndin hjá danska Fólkatinginum vitjar í Suðuroy mánadagin, og sum borgarstjóri er Kristin Michelsen ein av vertunum.

Og borgarstjórin ætlar sær ikki at fundast til langt út á náttina.

Viðurskifti skulu kannast

Um borgarstjórin vildi, so kundi hann tikið onnur mál av skrá, og sett hetta málið á skrá ístaðin.

Men Kristin Michelsen sigur, at tað eru nøkur viðurskifti, sum skulu kannast, áðrenn málið, um hann kann sita sum bæði borgarstjóri og løgtingsmaður samstundis, er búgvið til ein býráðsfund.

Ósamd um arbeiðsorkuna

Javnaðarflokkurin í býráðnum á Tvøroyri heldur, at borgarstjórin røkir ikki sínar skyldur, sum hann skal sambært kommunustýrislógini.

”Listin av samtyktum, sum ikki blíva framdar, verður longri og longri, og tað kunnu vit ikki góðtaka. Er tað tí, at hann ikki megnar at røkja tvey fulltíðarstørv?,” spurdu javnaðarumboðini í býráðnum á Facebook sunnukvøldið.

Meira enn tað vilja tey ikki siga.

Kristin Michelsen sigur sjálvur, at hann kennir einki til, at listin við samtyktum, sum ikki verða framdar, er langur.