Meirilutin vil ikki byggja nýggj læknahøli

Ótíðarhóskandi hølisviðurskiftir og økt normering av kommunulæknum í Tórshavnar kommunu hevur við sær, at nýggjar læknaviðtalur skulu fáast til vega í Havn.

Málið var fyri á býráðsfundi í gjár, har minnilutin mælti til, at nýggj høli blivu bygd, men tað fekk ikki undirtøku.

Minniluti í býráðnum førdi fram, at tað kann gerast ein dýr loysn at leiga, tí fyrilyggjandi uppskot til leigusáttmála kostar um 245.000 krónur um mánaðin, umframt at umvælingar skulu gerast, ið kunnu kosta tilsamans 30 milliónir krónur. Óvist er, hvør situr við tí rokningini.

Sambært Anniku Olsen, borgarstjóri í Tórshavnar kommunu, so er málið komið í tólvta tíma, tí hølisviðurskiftini hjá læknunum eru ikki nóg góð, og arbeitt verður fram ímóti at avgreiða málið, áðrenn farið verður í summarfrí.

- Freistin er langt síðani farin. Vit skuldu havt bygt læknahøli fyri einum fýra ella fimm árum síðani. Tað hevur man so ikki viljað raðfest, men vit gera tað, sum vit kunnu, sigur borgarstjórin og leggur afturat, at málið væntandi kann avgreiðast áðrenn summarfrítíðina við einum eyka býráðsfundi í juni.