Fýra fólk vald í Próstadømisráðið

383 kirkjuráðslimir og prestar høvdu valrætt, nú valt varð til Próstadømisráðið og Føroya Stiftsstjórn.

Og luttøkan var góð, 96,7 prosent, ella 59 kirkjuráð av 61. 

Tveir listar komu til bæði valini. Fýra fólk eru vald í Próstadømisráðið at arbeiða saman við dómpróstinum. 

Ein varð valdur í Føroya Stiftsstjórn at arbeiða saman við einum almennum umboði og biskupi, sum er formaður í Stiftsstjórnini. 

Marjun A. Olsen í Øravíkarlíð, Leivur Højgaard í Saltanagará, Uni Danielsen í Hoyvík og Kathrina L. Holm í Havn, tvey á hvørjum lista, eru vald í Próstadømisráðið. 

Jógvan Ravnsfjall í Klaksvík er valdur í Stiftsstjórnina.

Valskeiðið byrjar 1.apríl, og tað varir í fýra ár.

Próstadømisráðið viðgerð fíggjarætlanirnar hjá kirkjuráðunum, gevur stiftsstjórnini tilmæli til góðkenning av fíggjarætlanunum og góðkennir roknskapirnar hjá kirkjuráðunum.

Próstadømisráðið skal eisini geva ummæli í málum um útvegan og avhending av fastari ogn, um bygging og niðurtøku av bygningum, um umvælingar- og umbyggingararbeiði, sum eftir galdandi reglum skulu leggjast fyri stiftsstjórnina til góðkenningar og um onnur mál av stórum týdningi fyri kirkjuligu kassarnar.