Danir dumpa politikarar í kanning um trúvirði

Tað er Epinion, sum hevur gjørt kanningina fyri Radius Kommunikation, og 25 fakbólkar eru skipaðir í raðfylgju eftir, hvussu stórt trúvirði danir halda, at teir hava.

Kanningin er grundað á svar frá 2037 útvaldum umboðandi dønum í august mánaði.

Jarðarmøður ovast

Fakbólkarnir eru settir í raðfylgju frá eitt til fimm, har fimm er sera gott trúvirði og eitt er sera lágt trúvirði.

Meðan jarðarmøður liggja ovast við 4,13 stigum, liggja politikarar í botni við 2,07 stigum.

Og frágreiðingin er einføld, hví tað er so, sigur Nicolaj Taudorf Andersen, nevndarformaður í Radius Kommunikation.

- Bólkarnir hava størst trúvirði, sum gera tænastur fyri vælferðasamfelagið hjá okkum dønum. Tað eru tey, sum vit hava hitt - andlit til andlits, og sum hava hjálpt okkum, og serliga í sambandi við sjúkur, sigur hann.

- Læknar og advokatar kunnu missa rættin at arbeiða, um teir gera nakað galið ella ikki halda etisku reglurnar. Tað vil siga, at nakrir stovnar gera, at tey hava eitt rímiliga høgt trúvirði, sigur hann.

Góð ráð

Hetta er níggjundu ferð, at felagið ger slíka kanning, og hvørja ferð hava poltikarar ligið í botninum. Okkurt árið lógu spindoktarar lægri, men teir eru ikki við í kanningini longur.

Nicolaj Taudorf Andersen sigur at tað er ymiskt, hvat hvør fakbólkur skal gera fyri at bøta um trúvirði. 

Embætisfólk kunnu til døma tosa skilligari, meðan journalistar og politikarar skulu læra seg at viðganga, tá teir hava tikið skeiva avgerð, skrivar danska tv2.