Lærarafelagið undrast

Tað undrar Lærarafelagið ikki sørt, at starvið sum skúlastjóri í Skúlanum á Fløtum í Havn er lýst leyst av nýggjum, hóast tíggju umsøkjarar eru til starvið

Tað kemur fyri av og á, at myndugleikar lýsa almenn størv av nýggjum, tá ov fáir umsøkjarar eru. 

Halda tað vera undranarvert

At lýsa skúlastjórastarvið í Skúlanum á Fløtum leyst av nýggjum, tá tíggju umsøkjarar eru, kann ikki sigast at vera annað enn sera óvanligt og undranarvert. 

Lærarafelagið og nógvir limir okkara spyrja, hvør er veruliga orsøkin, skrivar Herálvur Jacobsen, formaður í Lærarafelagnum í Skúlablaðnum. 

Endurlýsing við tíggju umsøkjarum er óvanlig fyrisitingarlig mannagongd, sigur hann. Freistin at søkja um stjórastarvið í Skúlanum á Fløtum er hesa ferð 5. juli.