Endaliga atkvøðugreiðslan verður í dag

Triðja viðgerð verður á tingfundinum, sum byrjar klokkan 10 fyrrapartin, og hjúnabandslógin er fyrsta mál á skránni. Við aðru viðgerð varð uppskotið samtykt við 19 atkvøðum fyri og 14 ímóti.

Sambært uppskotinum hjá Rigmor Dam, landsstýriskvinnu, verður grein 14, annað stykki, í hjúnabandslógini broytt soleiðis, at kirkjan sjálv ger av, um hon vil signa borgarliga vígd samkynd. 

SÍ EISINI Bispur og prestar eru ósamdir um hjúnabandslógina

Samgongumboðini í mentanarnevndini tóku undir við uppskotinum. Tey søgdu í álitinum, at lógarbroytingin gevur hvørki boð ella forboð, men virðir kirkjunnar sjálvræði at skipa síni egnu innaru viðurskifti.

Minnilutin, Bjørn Kalsø í Sambandsflokkinum, mælti frá at samtykkja uppskotið, og minnilutin, Jógvan á Lakjuni í Fólkaflokkinum, mælti staðiliga frá at samtykkja tað. 

Tá málið varð til aðru viðgerð, varð roynt at fáa tað aftur í nevnd, og Jenis av Rana í Miðflokkinum og Jørgen Niclasen í Fólkaflokkinum skutu eisini upp at hava fólkaatkvøðu um málið. Bæði uppskotini fullu.