Trump ørkymlar sviar

Svenska sendistovan í Washington hevur biðið amerikanska uttanríkisráðið um at nágreina eina serliga útsøgn um Svøríki hjá Donald Trump, forseta, í eini røðu, hann helt fyri viðhaldsfólki í Florida leygardagin.

Forsetin róði í røðu síni framundir, at okkurt álvarsligt var hent í Svøríki fríggjadagin, uttan at greiða nærri frá tí. Tað skrivar svenska tíðindastovan TT.

Má útgreina útsøgn

- Hyggið, hvat hendi í Svøríki í gjár, segði Trump í sama viðfangi, sum hann nevndi fleiri europeiskar býir, har yvirgangsatsóknir hava verið.

Men einki serligt hendi í Svøríki fríggjadagin, og nú vil svenska stjórnin so hava at vita, hvat Donald Trump meinti við.

Eftir nógva almenna umrøðu svaraði Donald Trump forseti á Twitter sunnukvøldið.

Greinin heldur fram niðanfyri

My statement as to what's happening in Sweden was in reference to a story that was broadcast on @FoxNews concerning immigrants & Sweden.

— Donald J. Trump (@realDonaldTrump) February 19, 2017

- Mín útsøgn um, hvat fer fram í Svøríki, var ein ávísing til eina søgu, sum varð víst á Fox News um innflytarar og Svøríki, skrivar hann.

Útsøgnin hjá Donald Trump hevur fingið stórt afturljóð á sosialu miðlunum, millum annað frá fyrrverandi svenska uttanríkisráðharranum, Carl Bildt.

- Svøríki? Yvirgangsálop? Hvat hevur hann roykt?, spurdi Carl Bildt á Twitter.

Sitandi svenski uttanríkisráðharrin, Margot Wallström, viðmerkti eisini á Twitter. "Oxford Dictionaries valdi "post truth" til ársins orð í 2016," skrivaði hon.