Varðveitingararbeiðið heldur fram

Tvey tey norðastu húsini á Hvalastøðini við Áir standa aftur trygg. Tað boða Søvn Landsins frá í tíðindaskrivi.

Perlan, sum var vaktarhús, var í vánaligum standi. Tí hevur verið neyðugt at skifta út partar av stórviðinum, vindeygu, klædning og tekju.

SÍ EISINI Fáa ikki handverkarar til arbeiðið

Kemis, har bótarmolar vórðu framleiddir úr hvalatvøsti, hevur fingið nýggj vindeygu, sperrur og tekju. Ávíst stoypiarbeiði er eisini farið fram í ár.

Játtar løgtingið hvalastøðini pening á fíggjarlógini fyri 2017, verður farið í holt við Planin og Eldsmiðjuna, stendur í skrivinum.

Fyrsti parturin liðugur næsta ár

Av øðrum timburarbeiði er at fáa gjørt ventiliatiónkassa til Tørkuna. Tað er eisini arbeiði hjá múrara og jarnsmiði á Kvernuni og Ketilshúsinum, sum liggur og bíðar.

Enn eru avbjóðingar eftir og uppgávur at loysa inni í øllum húsum. Somuleiðis innskipan og kervi við gøtum, farleiðum við meira úti.

Eftir ætlan verður arbeiðið at tryggja øll húsini uttan liðugt komandi ár. Sostatt verður komið á mál við fyrsta stig í 2017.