Generalur: Hundraðtals IS-hermenn dripnir

Útivið 1.000 stríðshugaðir hermenn hjá Islamskum stati hava síðstu dagarnar latið lív í irakiskum stórbýi, sigur amerikanskur herovasti

Irakiskir hermen í útjaðaranum í irakiska býnum, Mosul, har 800-900 stríðssinnaðir hermenn hjá Islamskum stati eru dripnir síðstu dagarnar sambært einum herovasta

Mynd: AP

Bjarni Mohr

27.10.2016 - 16:06

- Bara í átøkunum síðstu hálvaaðru vikuna meta vit, at umleið 800-900 hermenn hjá Islamskum stati eru dripnir, sigur Joseph Votel, herovasti, sambært AFP.

Álopini byrjaðu fyri 10 døgum síðani, og hava higartil verið miðsavnað á býir og í lendinum uttan fyri Mosul, ið er næststørsti býurin í Irak.

Bardagar kunnu harðna

Mótstøðan kann tó gerast dyggari tá irakisk herlið taka seg inn í sjálvan býin. Tað er torført at siga, hvussu nógvir IS-hermenn eru í økinum, sigur generalurin.

Amerikanarar hava áður mett, at 3500-5000 jihadistar frá IS eru í irakiska stórbýnum, meðan hildið verður, at felagsskapurin hevur 2000 fólk í býum uttan fyri Mosul.

Donsk hernaðarflogfør hava eisini tikið lut í álopum á Islamskan stat í Mosul. Tað upplýsti danski ráðharrin í verjumálum, Peter Christensen, sambært DR, fyrradagin.