Hann sleppur eisini í Løgtingið

Býráðsfundur var klokkan 12:30 í dag. Har samtyktu teir sjey býráðslimirnir hjá Javnaðarflokkinum, at Heðin Mortensen eisini kann sita í Løgtinginum.

Tjóðveldi, sum situr í andstøðu, atkvøddi ímóti, meðan Fólkaflokkurin ikki greiddi atkvøðu, og umboðið hjá Sambandsflokkinum var ikki á fundi.

SÍ EISINI Biður um frávik so hann kann røkja bæði størvini

Heðin Mortensen, borgarstjóri setti sjálvur býráðsfundin. Av tí at málið snúði seg um hann, fór hann síðani av býráðsfundinum, og Jógvan Arge, varaborgarstjóri setti seg í formanssessin.

Samstundis kom tiltakslimurin hjá Javnaðarflokkinum, Rúni Djurhuus á býráðsfund. Eitt ávíst orðaskifti var á fundinum.

Býráðið átti ikki at umrøtt málið

Á býráðsfundinum varð millum annað varð ført fram, at býráðið ikki átti at umrøtt eitt slíkt mál, tí Løgtingið átti at broytt kommunulógina, so borgarstjórar ikki kunnu sita í Løgtinginum, samstundis sum teir eru borgarstjórar.

Atkvøðugreiðslan var kortini greið. Teir sjey býráðslimirnir hjá Javnaðarflokkinum atkvøddu fyri áheitanini frá Heðini Mortensen, um at hann eisini kann sita í løgtinginum.

Tey trý umboðini hjá Tjóðveldi atkvøddu ímóti á býráðsfundinum, meðan hini umboðini hjá flokkinum ikki greiddu atkvøðu.