Bygdaráðið á Strondum helst skipast av nýggjum

Bygdaráðið á Strondum helst skipast av nýggjum
Fundurin leygarkvøldið, tá bygdaráðið í Sjóvar Kommunu skipaði seg, er ikki hildin á lógligan hátt, sigur bygdaráðslimur, sum hevur kært til Løgmálaráðið
25.11.2024 - 19:21

Valkvøldið søgdu báðir toppskorararnir í Sjóvar kommunu seg vilja hava eina breiða semju. Og kvøldið eftir gjørdu Hans Anders Jacobsen, fyrstvaldur á lista B, og Noomi Káradóttir Rasmussen, fyrstvald á lista A (kvinnulistin) semju um, hvussu allir sessirnir í nývalda bygdaráðnum skuldu býtast. Allir sjey, nývaldu bygdaráðslimir skrivaðu undir hesa politisku semju, mikukvøldið 13. november.

Men á bygdaráðsfundi á Strondum leygarkvøldið 23. november var vent í holuni. Nú var Noomi Káradóttir Rasmussen ikki longur partur av semjuni. Noomi Káradóttir Rasmussen hevði frammanundan gjørt varug við, at bygdaráðsfundurin var ikki lýstur og hildin á lógligan hátt. Hon góðtók ikki, at fundurin ikki var almennur, og harumframt var hann ikki lýstur eftir forskriftunum. 

Og tað, sum byrjaði sum ein breið semja, endar tí við eini kæru frá Noomi Káradóttir Rasmussen til Løgmálaráðið.

Løgmálaráðið staðfestir, at sum útgangsstøði eru allir býráðsfundir almennir, og innkallast skal við ávísari freist, sum vanliga er fýra dagar. Sambært Elinborg Apol, fulltrúa í Løgmálaráðnum, er einki sum talar fyri, at ein fundur, har eitt bygdaráð skipar seg, skal haldast fyri afturlatnum hurðum. 

Verður kæran gingin á møti, so hevur landsstýrismaðurin heimild til at ógilda bygdaráðsfundin. Og so skal innkallast til nýggjan fund, har bygdaráðið skipar seg.

Kommunulóggávan ásetir, at nýtt kommunustýri skal taka við á nýggjárinum. Løgmálaráðið sigur, at kæran verður avgreidd í góðari tíð áðrenn tað.

Hans Anders Jacobsen, fyrstvaldur í Sjóvar kommunu, hevur ongar viðmerkingar til málið. 

 

 
Er kopiera
Nýggjastu sendingar í ÚV
Fríggjadag 4. apríl
Vikuskiftið 4 apríl 2025
190276
Fríggjadag 4. apríl
Breddin: Suðuroyartunnilin
190254
Fríggjadag 4. apríl
Morgunlestur fríggjadagur 4.apríl 2025
189979
Hósdag 3. apríl
RagnarRokk 3.apríl 2025
189927
Nýggjastu sendingar í SV
Fríggjadag 4. apríl
Veðrið
190275
Fríggjadag 4. apríl
KAKUMiKS (2:7)
190170
Fríggjadag 4. apríl
Dagur og vika - teknmálstulkað
190243
Hósdag 3. apríl
Dagur og vika - teknmálstulkað
190208
Hósdag 3. apríl
Dagur og vika - teknmálstulkað
190180