Mjørki og ófriður ávirkaðu roknskapin hjá Atlantic

Avlopið var 7,4 mió. kr. eftir skatt, knappliga helvtina minni enn í 2012.

Ferðafólkatalið vaks tó og inntøkurnar vuksu eisini, so felagið væntar eitt betri ár nú í 2014.

Atlantsflog var óheppið í fjør. Avtalan við donsku ferðaskrivstovuna Atlantis Rejser um at flúgva til Egyptalands gav ikki ætlaða íkastið til raksturin, tí hóttanir og ófriður í Egyptalandi fingu fólk at setast aftur. 

Nógvur mjørki í Vágum síðsta summar elvdi til nógvar seinkingar og øktar útreiðslur. 

Eitt flogfar, sum Atlantsflog leigaði, kostaði eisini felagnum pengar, tá flogfarið varð latið aftur. 

Harumframt minkaði virksemið hjá Tyrlutænastuni. Og hægri leiga fyri flogfør og broytingar í leiðsluni, - felagið fekk nýgjan stjóra í november - góvu felagnum eykaútreiðslur í 2013. 

Einki vinningsbýti

Serliga seinasti ársfjórðingurin var ringur. Tá var hallið 7,1 millión krónur eftir skatt.

Nevndin í Atlantsflogi skjýtur upp, at einki vinningsbýti verður latið fyri 2013, tí felagið í næstum ætlar at keypa partabrøvini aftur frá minnilutaeigarunum. 

Í Atlantsflogi fegnast tey tó um, at 17.000 fleiri ferðafólk vóru í fjør enn árið fyri. Ferðafólkini vóru 225.000 í fjør.

Inntøkurnar hjá felagnum vóru 542,2 milliónir, góðar 40 milliónir meira enn í 2012.   

Leiðslan í Atlantsflogi væntar eitt nógv betri úrslit í ár enn í fjør. Og tað er gott grundarlag at byggja nýggju strategiina á, sum nevndin hevur álagt stjórnini at koma við í juni í ár.

Atlantsflog skuldi hava aðalfund 3.apríl, men hann er fluttur til 30.apríl.

Les allan roknskapin her: Atlantic Airways Ársroknskapur 2013