Landsfelag Pensjónista: Samhaldsfasti eigur at prísjavna útgjaldið

1. januar 2025 hækkar mánaðargjaldið úr Samhaldsfasta við 130 krónum. 

Men sambært Landsfelag pensjónista eigur útgjaldið at vera væl hægri.

Tey vilja hava Samhaldsfasta at prísjavna útgjaldið.

Útgjald skal fylgja prísvøkstrinum

- Sambært prísvøkstrinum burdu vit fingið minst tríggjar ferðrir so nógv - eini 328 krónur ella meira um mánaðan - í staðin fyri tær 130 krónurnar, tað sigur Beate L. Samuelsen. 

Sambært henni hevur væntandi prísjavnanin stóra ávirkan á støðuna hjá pensjónistum í Føroyum. 

Samhaldsfasti bleiv sett á stovn fyri at hjálpa pensjónistum við at fáa gerandisdagin til at hanga saman fíggjarliga, og tað er júst í eini tíð sum hesari, har tað er blivið munandi dýrari at liva, at pensjónistar eiga at verða hjálptir, sigur Beate L. Samuelsen.

Samhaldsfasti skal ikki bjarga haldføri landsins

Landsfelag Pensjónista hevur biðið Samhaldsfasta um at endurskoða niðurstuðuna og prísjavna útgjaldið, men sum nú er vilja tey ikki tað.

Orsøkin, sambært Beate L. Samuelsen, er haldføri hjá landinum og at pensjónisaldurin nú hækkar. 

Beate L. Samuelsen heldur fast í, at hetta ikki hevur nakað við málið at gera.

- Pensjónistar eiga at fáa teir pengarnir, teir hava rætt til. Tað er ikki uppgávan hjá Samhaldsfasta at bjarga haldførinum hjá landinum

Nú vil Landsfelag Pensjónista hava Samhaldsfasta til enn einaferið at umhugsa støðuna.