Yvirgangsatsókn móti Svøríki og svium

- Alt bendir á, at talan er um eina yvirgangsatsókn móti Svøríki og svium.

Tað segði Ulf Kristersson, forsætisráðharri, um álopið í Brússel í gjárkvøldið, har ein maður skeyt og drap tveir svenskar fótbóltsfjepparar og særdi ein annan.

Svenski forsætisráðharrin hevði tíðindafund í Stokkhólmi fyrrapartin:

Maðurin, sum hildið verður framdi álopið í Brússel í gjárkvøldið er deyður.

Løgreglan skeyt mannin í Schaerbeek-grannalagnum í landnyrðingspartinum av belgiska høvuðsstaðnum.

Løgreglan váttar fyri blaðnum DH, at leitað verður eftir tveimum fólkum aftrat í sambandi við álopið. 

Ulf Kristersson segði eisini á tíðindafundinum, at maðurin hevur verið í Svøríki viðhvørt.

Forsætisráðharrin vildi tó ikki siga, nær ella hvussu leingi, hann hevur verið í Svøríki.