761 børn í 1. flokk

Í dag er fyrsti skúladagur, og í ár byrja 761 børn í 1. flokki. 

Talan er um ein lítlan vøkstur samanborið við í fjør, tá um 730 børn fóru í fyrsta flokk.

Skúlin, sum tekur ímóti flest nýggjum næmingum, er Skúlatrøð við 76 næmingum; tríggir teirra byrja í serflokki. 

Í fimtan skúlum byrja færri enn 10 næmingar; í fýra teirra bara ein næmingur.

Skúlin á Fløtum størsta forskúla

Hetta skúlaárið eru eins og í fjør 11 forskúlar við tilsamans 233 næmingum samanborið við 226 í fjør.

Størsti forskúlin er í Skúlanum á Fløtum við 53 næmingum. Honum á baki koma Runavíkar kommunuskúli og Sankta Frans skúli við ávikavist 48 og 47 næmingum.

Serflokkarnir eru tíggju í tali, næmingatalið er 208, harav 148 eru dreingir; harumframt kemur Lopfjølin, sum er partur av Skúlanum á Fløtum, við níggju næmingum.

Í teimum trimum frískúlunum ganga 169 næmingar. Størstur av frískúlunum er Frískúlin Keldan við 87 næmingum.

Næmingatalið fyri alt landið er 7.113.

Tað boðar Skúlablaðið frá.