Kina: Uppreisturin er innanhýsis mál í Russlandi

Kina kom við fyrstu viðmerking síni til uppreisturin hjá Wagner-herinum 24 tímar eftir, at hergongan móti Moskva steðgaði.

- Hetta er innanhýsis mál hjá Russlandi, sigur kineski uttanríkisráðharrin í tíðindaskrivi í gjárkvøldið.

- Sum vinarligi grannin hjá Russlandi og strategiski felagin í nýggju heimsskipanini, stuðlar Kina Russlandi í at hava støðufesti og í arbeiðnum fyri menning og framgongd, stendur í viðmerkingini.

Fráboðanin úr Beijing kom langt eftirm at uppreisturin var avgreiddur við samráðingum. 

Varauttanríkisráðharri fór til Beijing

Russiski varauttanríkisráðharrin, Andrey Rudenko, fleyg í gjár til Beijing at hitta kinesiska uttanríkisráðharran, Qin Gang. 

Teir tosaðu um kinesisk-russisk viðurskifti og felags altjóða og landspartaáhugamál, sigur kinesiska uttanríkisráðið.

Báðir partar skulu hava váttað, at teir standa saman, og hava politiskt álit hvør á øðrum, skrivar CNN.

Fer til Hvítarusslands

Leiðarin fyri Wagner-herinum, Jevgeny Prigozhin, hevur í avtaluni um at gevast við uppreistrinum váttað at fara úr Russlandi til grannalandið Hvítarussland.

Myndugleikar í Hvítarusslandi siga, at teir kunnu ikki vátta, at Prigozhin er komin til landið, ella hvør støðan er hjá honum nú.

Russiska undirhúsið fyrireikar nú eina lóg, sum skal regulera Wagner-leiguherin, skrivar CNN.