Holland: Ukraina ætlaði at spreingja Nord Stream-leiðingina

Amerikanska fregnartænastan, CIA, var í juli fjør kunnað um eina ukrainska ætlan um at spreingja Nord Stream-rørleiðingina í Eystursjónum.

Tað sigur hollendska kringvarpið, NOS, sambært Reuters.

Tað var fregnartænastan hjá hollendska herinum, MIVD, sum í juli 2022 boðaði CIA frá eini møguligari ukrainskari ætlan at oyðileggja oljuleiðingina í Eystursjónum.

Hetta førdi sambært NOS til, at USA ávaraði Kyiv um at lata rørleiðingina fáa frið.

Nord Stream, gass úr Russlandi, gass, gassleiðing úr Russlandi

(Mynd: Ritzau Scanpix)

Sabotasja

Tveir mánaðir seinni, tann 26. september 2022, gjørdu spreingingar skaða á bæði Nord Stream 1 og Nord Stream 2-rørleiðingarnar, sum leiða gass úr Russlandi til Týsklands.

Bæði USA og NATO kallaðu spreingingarnar fyri sabotasju.

Danmark, Svøríki og Týskland kanna framvegis, hvat hendi við rørleiðingunum. Russland hevur ákært kanningarliðini fyri at drála og royna at dylja, hvør framdi sabotasjuna.

Ukraina hevur noktað at hava havt nakað við spreingingarnar at gera.

Frágreiðingin kemur í heyst

Svenski ákærin, Mats Ljungqvist, vónar, at leggja síðstu hond á svensku frágreiðingina í heyst.

Tað sigur hann við svenska kringvarpið sambært Retuers.

Svenski ákærin sigur við svenska útvarpið, at hann millum annað hevur fundast við týska ákæran, men hann vil ikki fara í smálutir við hesum.

Mats Ljungqvist sigur kortini, at hann er bjartskygdur um at fáa greiði, hvør framdi sabotasjuna.