Mál um tvímæltar journalistar noyðir landsstýrismann frá

Í Grønlandi hevur landsstýrismaðurin í útbúgving, mentan, ítrótt og kirkju lagt frá sær. 

Peter Olsen hevði lovað at seta arbeiðsbólk, sum skuldi koma við loysn um, hvussu fleiri journalistar, sum tosa grønlendskt, kunnu koma í starv. 

Danska fakblaðið Journalisten hevur í 2022 og 2023 lýst, hvussu grønlendskir miðlar eru noyddir at skerja talið av sendingum, tí ov fáir journalistar eru, sum tosa grønlendskt.

Sambært grønlendska kringvarpinum, KNR, í gjár, er arbeiðsbólkurin ikki mannaður enn.

KNR, grønlendska kringvarpið - Mynd: Journalisten.dk

Tað gongur illa at fáa journalistar, sum duga bæði danskt og grønlendskt, til grønlendska kringvarpið, KNR, og málið hevur nú fingið politiskar avleiðingar. (Savnsmynd)

Hevur mist stuðulin

- Eg leggi frá mær, tí eg fái ikki longur stuðul frá meirilutanum. Eg havi lurtað eftir atfinningunum frá landstinginum, hóast eg havi gjørt mítt besta,  skrivar Peter Olsen á Facebook. 

Nivi Olsen, landstingslimur fyri fjórðstørsta flokkin í Grønlandi, Demokraatit, sigur, at økið er slept upp á fjall, og at málið um tvímæltar journalistar í KNR er ikki loyst.

- Vit hava bíðað í níggju mánaðir. Eg fyrireikaði at reisa misálit á Peter Olsen, men nú hevur hann lagt frá sær, sigur Nivi Olsen við KNR.