Russland stýrir nú ST-trygdarráðnum

Russland yvirtekur í dag formansskapin í ST-trygdarráðnum. Sostatt skal ráðið, sum hevur til uppgávu at varðveita frið og trygd í heiminum, tann komandi mánaðin stýrast av einum landi, hvørs forseti er ákærdur fyri krígsbrotsverk.

Ukrainski uttanríkisráðharrin Dmytro Kuleba kallar hetta "heimsins vánaligasta aprílsøga".

"Landið, sum systematiskt ger seg inn á allar grundleggjandi reglur um altjóða trygd, situr nú við borðendan í einum stovni, hvørs einasta endamál er at verja og varðveita altjóða trygd," sigur Kuleba sambært CNN.

Formansskapurin í ST-trygdarráðnum gongur upp á skift millum tey 15 limalondini í trygdarráðnum. Av hesum eru fimm fastir limir. Teir eru Russland, Kina, USA, Bretland og Frakland.

Eygleiðarar halda ikki, at tað fer at ávirka sjálvt kríggið í Ukraina stórvegis, at Russland hendan komandi mánaðin hevur formansskapin í trygdarráðnum. 

Talan er ikki um ein so øgiliga valdsmiklan sess, men hann gevur Russlandi møguleika at skipa fundir um evnir, sum landið sjálvt kann velja. Og Russland hevur longu boðað frá, at ein fundur verður um, hvussu lond bróta bann móti vápnaútflutningi. Mett verður, at hetta er eitt politiskt prik til serliga USA, sum hevur hjálpt Ukraina við vápnum.

Seinast, Russland hevði formansskapin í ST-trygdarráðnum, var í februar 2022 - sama mánað, sum russiskar herdeildir gjørdu innrás í Ukraina.