Turið: - Framgongdin hevur verið øgilig

Turið Arge Samuelsen mann teljast millum størstu hondbóltspersónligheitirnar í føroyskum hondbólti yvirhøvur.

Atletisku evnini eru eyðsæð - sama er viljin at vinna. Tí kom vongurin, sum seinni er vorðin bakkur, á landsliðið longu í 2012, og síðan hevur hon spælt meir enn 40 ferðir fyri Føroyar.

12 ár seinni er hon enn millum lyklaspælararnar, men framgongdin hevur verið øgilig síðstu árini, viðgongur hon.

 - Tað er næstan soleiðis, at tú næstan ikki hevur klárað at fylgt við, sigur hon.

 - Tá eg byrjaði, var einki skipað virksemi um landsliðið. Vit spældu undan-undankappingar og vinardystir, og í dag skulu vit spæla EM, har vit eru saman í ein hálvan mánaða frammanundan. Menningin hevur verið øgilig.

Tað vóru fólk og spælarar, sum vildu meir enn at spæla einstakar dystir 'hist og pist', heldur Turið Arge Samuelsen. 

 - Eg hevði ikki torað at droymt so stórt, og at vit standa her í dag, eri eg bæði fegin og bilsin um, sigur hon.

Hoyr eisini, hvat Turið Arge Samuelsen heldur um at spæla uttanlands í innslagnum omanfyri.