FMA 2025: Silvurdrongur átti ársins tekst og myndlistarliga samleika 

"Royni at blíva ein betri maður  
ella hvat fuck er tað eg sigi 
Eg royni fyrst og fremst at blíva til ein mann 
til eitt menniskja 
Tað er ikki so lætt í dag 
Eg føli trýstið í dag 
Eg føli pressið í dag" 

Soleiðis byrjar Silvurdrongur tekstin til sangin "Mánadrongur".  

Teksturin er blivin heiðraður sum ársins tekstur til FMA 2025, sum verður hildið í Varpinum í Klaksvík í kvøld.  

Teksturin viðger tilverunnar stóru spurningar, eitt nú hvussu mann verður ein betri maður og hetta at arva syndirnar hjá forfedrunum.  

Nú æt eg eftir ánni 

"Mánadrongur" er at finna á plátuni "Nú æt eg eftir ánni", sum Silvurdrongur gav út í fjør. Talan er um eina sonevnda konseptplátu, ið snýr seg um lívið og forfall.  

Hini tilnevndu vóru: 

• "Nú ert tú moldin" hjá Leu Kampmann, skrivað hava Lea J. K. Kampmann og Teitur Lassen 
• "Lívsandin" hjá Eivør, skrivað hevur Marjun Syderbø Kjelnæs 
• "Tekin uppá lív" hjá Aggrasoppar skrivað hava Dania O. Tausenen, Trygvi Danielsen og Eyðfinn Bogason Lamhauge 
• "Nætur níggju" hjá Hamradun skrivað hevur Pól Arni Holm 

Plátan "Nú æt eg eftir ánni" hjá Silvurdrongi bleiv umrødd í sendingini LEITISSTEIN í fjør, har Trygvi Danielsen var gestur.  

Eisini besti myndlistarligi samleiki

Trygvi Danielsen legði eisini stóra orku í tað myndlistarliga úttrykkið í sambandi við útgávuna av "nú æt eg eftir ánni". 

lp-cover.jpg

Umframt ein sera flottan húsa, so bleiv eisini gjørdur ein filmur um útgávukonsertina á G! festivalinum, "Transformation". 

Mánadrongur 

eftir Trygva Danielsen  

Royni at blíva ein betri maður  
ella hvat fuck er tað eg sigi 
Eg royni fyrst og fremst at blíva til ein mann 
til eitt menniskja 
Tað er ikki so lætt í dag 
Eg føli trýstið í dag 
Eg føli pressið í dag 

Eg føli at saman hava vit bygt hetta 
í felag hava vit evnað okkar arvasynd 
Vit hava arvað synd 
Vit produsera synd 
Men kanst tú gera eitt sindur við tað 
Kanst tú reisa teg at vitna 
um hvat er sum ger teg skitnan 
Hvat fyri helviti tú skalt hitta fyri at reinsa teg 
Eg meini ikki pussa gloriuna 
Koyr hana í skrell 
Eg meini 
Hvat tað er sum ger teg menniskja 

Hvat tað er sum ger teg menniskja  
Er tað tú sum ger meg menniskja?  
Er tað eg sum geri teg menniskja?  
Saman eru vit komin her fyri at doyggja  
Saman eru vit komin her fyri at skeldast fyri at hata 
fyri at øvunda og misunna 
Saman eru vit komin her fyri at øsa okkum 
Fyri at sløsa alt burt 
Fyri at spilla hesa jørðina 
Sum vit øll hava fingið 
í føðingardagsgávu 
Ja 

Hugsa um allar tínar forfedrar 
Eg meini ikki bara ommu og abba  
og langommu og oldurabba 
Heilt aftur til afrika 
Eg meini tey sum grulvaðu úr havinum 
so at tú kundi ganga í fjøllunum 

Hvat høvdu tey sagt um tey sóu teg í dag  
spákandi eftir gøtuni 
í deprimeraðum lag 
við høvdinum undir arminum 
sinnið eitt annað stað 
Hvat skal eg gera við mitt lív  
Hvussu skal eg hava ráð til at búgva 
Havi eg yvirhøvur hug til at liva? 
Hvat kann eg gera fyri at blíva til eitt menniskja  
í harmoni við mitt umhvørvi 
Kants kategoriska imperativ 
Eg mangli terapi 
Eg mangli jung 
Eg mangli nietzsche 
Nah 
Eg mangli ikki fleiri deyðar hvítar menn 
Eg mangli at fiksa mínar tenn 
Ringja til mín besta vin 
Drekki eitt sindur vín 
Diskutera alt og einki 
og alt í senn 

Tað er tað sum ger meg menniskja  
Tað er tú sum ger meg menniskja  
Tað eri eg sum geri teg menniskja  
Saman eru vit komin her fyri at klemmast 
Saman eru vit komin her fyri at minnast  
Fyri at hjálpa 
Fyri at elska so gott vit kunnu 
Saman eru vit komin her fyri at blóma 
fyri at trivast 
og fáa lívið til at nørast 
har vit eru 
Saman eru vit komin her fyri at blóma 
fyri at trivast 
og fáa lív at nørast 
har sum vit eru