Danmark letur Ukraina eina milliard aftrat

Mette Frederiksen, forsætisráðharri, var í Kyiv í gjár í sambandi við, at 1.000 dagar eru farnir, síðani Russland leyp á Ukraina

Mette Frederiksen, forsætisráðharri, og ukrainski forsetin, Zelenskij, høvdu felags tíðindafund í Kyiv í gjár.

Mynd: Ritzau Scanpix

Emil Lisberg Jacobsen

20.11.2024 - 08:24

Danmark fer at lata eina milliard krónur aftrat til ukrainska vápnaídnaðin í stríðnum móti Russlandi.

Tað boðaði danski forsætisráðharrin, Mette Frederiksen, frá á tíðindafundi í Kyiv í gjár, har hon hevur vitjað í sambandi við, at tað í gjár vóru 1.000 dagar, síðan russiska innrásin í Ukraina byrjaði.

Á felags tíðindafundi hjá Mette Frederiksen og ukrainska forsetanum, Volodymyr Zelinsky, segði hon, at hjálpin úr vesturheiminum hevur verið alt ov leingi á veg, og at tað ofta eru ov nógvar avmarkingar á, hvussu hjálpin til Ukraina kann brúkast.

Mette Frederiksen segði við danska kringvarpið, at Evropa má standa saman í stuðlinum til Ukraina, tí sambært henni fer Vladimir Putin ikki at steðga við Ukraina. Um vesturheimurin og Evropa ikki standa saman, verður fyrr ella seinni einki Evropa eftir, segði Mette Frederiksen.