Sverri Sandberg Nielsen: "Góður róður, men eg kann rógva betur"

Sverri Sandberg Nielsen róði seg flúgvandi í finaluna, tá hann í morgun róðið innleiðandi róðurin við OL í París. 

Stóri spurningurin undan róðrinum var ikki, um Sverri megnaði at rógva seg víðari, men meira hvussu fór at vera við ryggpínuni, ið føroyski rógvarin hevur drigist við síðstu dagarnar. 

"Tað var ikki heilt pínuleyst at rógva í dag, og tað er ikki gott at skula kappast undir sovorðnum umstøðum. Men nú eru vit í gongd, og tað gekk væl, so eg byrja at blíva meira tryggur við, at ryggurin skal nokk halda, og tað skal nokk fara at ganga."

Sverri Sandberg Nielsen helt ikki, at ryggtrupulleikarnir ávirkaðum hann undir róðrinum. 

"Tað ávirkar meg ikki meir enn á tann hátt, at eg hugsaði um ryggin, meðan eg róði. Eg haldi, at eg róði væl, men eg haldi eisini, at eg kann gera tað betur."

Sverri Sandberg Nielsen

Mynd: Ritzau/Scanpix

Byggir upp

Rógvikappingin til einari olympiskar leikir er rættiliga drúgv, og tað er nakað, ið Sverra Sandberg Nielsen kennir væl til og dámar væl. 

"Eg havi fingið eina góða byrjan, og at eg havi nakrar dagar at rætta nøkur ting, og at sleppa út at venja eitt sindur. So júst tað kundi ikki verið betri. Tað er soleiðis við hesum kappingunum, at tað tekur langa tíð. Eg byggi upp til finaluna."

Sverri Sandberg Nielsen ásannar, at mann kemur ikki sovandi til nakað til eitt OL.

"Sjálvandi noyðist mann út at rógva skjótt í teimum innleiðandi róðrunum og í fjórðingsfinaluni. Tað er krúthørð kapping beinavegin í sovorðnum kappingum, men tað snýr seg nógv um at hækka støðið so líðandi frá innleiðandi róðrunum, til fjórðingsfinaluna, til hálvfinaluna og so finaluna."

Men niðurstøðan er greið:

"Hetta var ein góður róður, men eg haldi, at kann rógva betur enn hatta."

* Samrøðuna við Sverra Sandberg Nielsen gjørdi Jakob Melgaard í París fyri Kringvarpið