Elias og Kiel spentu bein fyri meistaradreymunum hjá Hákuni og Füchse

Elias Ellefsen á Skipagøtu skeyt trý mál, tá THW Kiel við javnleiki ímóti Füchse Berlin spenti bein fyri meistaradreymunum hjá Hákuni West av Teigum og teimum í høvuðsstaðnum.

Füchse Berlin streyk avstað frá byrjan við fimm málum á rað, áðrenn Kiel spældi seg inn aftur í dystin. Elias Ellefsen á Skipagøtu skeyt mál til 11-10 og 14-14, og tað var javnt 18-18 í steðginum.

Út við skaða

Føroyski bakspælarin skeyt eitt mál afturat í seinna hálvleiki, áðrenn hann fór av vøllinum við skaða. Ikki er greitt, júst hvat bagdi, men ein skaði kemur illa við hjá føroyinginum, sum eftir ætlan skal stýra álopsspælinum hjá landsliðnum, tá playoff-dystirnir ímóti Norðurmakedónia til HM-endaspælið eru á skránni 8. og 12. mai. Áðrenn tað eru Champions League-fjórðingsfinalurnar ímóti Montpellier á skránni.

Kiel javnaði í síðsta minutti

Füchse Berlin, sum hevði Hákun West av Teigum á beinkinum allan dystin, fór framum aftur, men Eric Johansson javnaði fyri Kiel í síðsta minutti, og Berlin-revarnir megnaðu ikki at svara aftur.

Magdeburg, sum vann á Jóhan á Plógv Hansen og Flensburg fríggjadagin, er á 1. plássi við 50 stigum fyri 28 dystir. Füchse Berlin hevur eisini 50 stig, men Hákun West av Teigum og teir hava spælt 29 dystir.