Trygd og verjupolitikkur í norðuratlantshavi

Tað er Granskingarráðið, ið fyrisitur skránna, og sum nú lýsir eftir teimum fyrstu umsóknunum til skránna FASDiNA, sum er stytting fyri Foreign Affairs, Security, and Defence Policy in the North Atlantic.

Tøka játtanin í fyrsta stuðulsumfarinum er 6,9 mió. kr. Ætlanin er at stuðla tveimum granskingarverkætlanum og trimum ella fýra styttri ritum, ella Policy Papers, skrivar Granskingarráðið á heimasíðuni.

Yvirskipaða endamálið er at skapa nýggja vitan um uttanríkisviðurskifti, trygd og verjupolitikk í Norðuratlants-økinum. Eisini er endamálið at menna samstarv millum Føroyar, Grønland og Danmark á hesum øki.

Harafturat vil skráin stuðla førleikamenning í uttanríkisviðurskiftum, trygd og verjupolitikki í Føroyum og Grønlandi umvegis ph.d. og postdoc verkætlanir.

Bráðnandi ísurin í Arktis orsakað av veðurlagsbroytingum hevur latið upp fyri nýggjum flutningsfarleiðum. Hetta hevur við sær øktan altjóða áhuga í Norðuratlantsøkinum og Arktisk og hevur latið upp fyri nýggjum uttanríkis- og trygdarpolitiskum spurningum í økinum.

Økt trýst er á Føroyar og Grønland frá stórveldum, sum royna at ávirka londini umvegis handilsligar og politiskar gerðir. Uttanhýsis trýstið kann ávirka bæði innlendis og útlendis dynamikkin, sum formar sambondini millum Føroyar, Grønland og Danmark, skrivar Granskingarráðið.