Eingi ráð um tøkugjøld í hesum árinum

Ongin frágreiðing um tilfeingisgjald í alivinnuni kemur frá Búskaparráðnum í hesum árinum.

Tað sigur Fróði Magnussen, formaður í Búskaparráðnum.

Bakkafrost kunngjørdi í dag úrslitið fyri annan ársfjórðing, og tað vísir eitt avlop upp á 587 milliónir kr.,  eitt úrslit, sum er serliga merkt av óvanliga høgu laksaprísunum fyrr í ár.

Fróði Magnussen

Fróði Magnussen er formaður í Búskaparráðnum.

Gjøldini tillagast

Hóast laksaprísirnir nú eru lækkaðir nakað aftur, segði løgmaður í ólavsøkurøðuni, at tøkugjøldini í alivinnuni skulu tillagast.

Magnus Rasmussen, landsstýrismaður í vinnumálum, hevur sagt, at hann vil lesa frágreiðingina frá Búskaparráðnum, áðrenn støða verður tikin. Tá vónanði landsstýrsmaðurin at fáa frágreiðingina í heyst.

Men arbeiðsorkan hjá Búskaparráðnum røkkur ikki til nakra frágreiðing um tøkugjøld í ár, sigur Fróði Magnussen.

Ætlanin var at skipa fyri einari ráðstevnu um tilfeingisvinnur og gjøld í november, sum síðani skal gerast til eina frágreiðing. Men hendan ráðstevnan er nú útsett til fyrst í komandi ári, sigur formaðurin í Búskaparráðnum.

Hoyr innslag í útvarpstíðindunum: