Tvey fólk dripin í Íslandi

Ein skottilburður á Blønduósi á Norðurlandinum í Íslandi tíðliga í morgun hevur kravt tvey mannalív og eitt fólk er sært.

Skotið var í einum sethúsum.

Maðurin, sum skeyt, var funnin deyður á staðnum. 

Politiið hevur tikið fólk í sambandi við hendingina.

Øll fólkini, tey deyðu, tað særda og tey tiknu vóru ella eru øll íslendsk og búðu ella búgva øll í Blønduósi. 

Tikin fyrr í ár

Tey kendust, sigur politiið, sum annars ikki vil siga so nógv um málið.

Fjølmiðlar í Íslandi siga, at politiið fyrr í ár tók byrsumannin, júst tí, hann hótti við byrsu í somu húsum, sum hann var í morgun.

Teir siga seg eisini vita, at byrsumaðurin hevur arbeitt hjá øðrum teirra, sum hann skeyt. 

Og maðurin, sum skal vera 36 ár, hevur verið á psykiatriskari deild, vita fjølmiðlar eisini at siga.