Flestu børnini fáa frítíðartilboð í heyst

Í heyst fáa flestu børnini, sum bíða eftir frítiðartilboði, slíkt tilboð.  

Í juni komu trý børn aftrat á listan við teimum, sum bíða eftir frítíðartilboð.

31. mai bíðaðu 31 børn í skúlaaldri, frá triðja flokki, eftir frítíðartilboði, 30.juni vóru tey 34.

Av teimum 34 hava fimm børn fingið bjóðað frítíðartilboð nú eftir summarfrítíðina.

Síðani hava fleiri søkt um frítíðartilboð, og bíðilistin er nú aftur 34 børn.   

Tað sigur Sólvit E. Nolsø landsstýrismaður, í svari til Eyðgunn Samuelsen, løgtingskvinnu.

Hann sigur eisini, at royndirnar vísa, at Almannaverkið fær tvær ella tríggjar umsóknir um frítíðartilboð eftir skúlabyrjan.  

Sólvit Nolsø - Mynd: Tórshavnar kommuna

Sólvit E. Nolsø, landsstýrismaður í almannamálum. (Mynd: Tórshavnar kommuna)

Tilboðið á Frúutrøð ger góðan mun

Við frítíðartilboðnum á Frúutrøð umframt annað høli í Havn hevur Almannaverkið, tá heystið kemur, hóskandi frítíðartilboð til øll børn í Suðurstreymoy, sum hava brúk fyri tí, sigur landsstýrismaðurin.

Arbeitt verður eisini við at víðka frítíðartilboðini hjá Almannaverkinum aðrastaðni í landinum.

Haraftat arbeiðir Almannaverkið við at gera seravtalur við tær kommunur, sum hava frítíðartilboð til børn í triðja flokki.

Tað verður gjørt soleiðis, at børn, sum hóast serliga tørvin kunnu megna at ganga í kommunala frítíðartilboðnum við eyka normering, fáa hóskandi tilboð. 

Við øllum hesum átøkum væntar Almannaverkið, at 27 av teimum 34 børnunum á biðilistanum fáa frítíðartilboð í heyst, sigur Sólvit E. Nolsø, landsstýrismaður.

Eyðgunn Samuelsen

Eyðgunn Samuelsen, løgtingskvinna, spurdi um frítíðartilboð í Almannaverkinum. (Mynd: Bjarni Árting Rubeksen)