Hava keypt brennievni fyri hálva aðru milliard

Meðan útflutningurin seinasta árið er vaksin 2,7 milliardir krónur, er innflutningurin vaksin 2,2 milliardir í sama tíðarskeiði, vísa tøl hjá Hagstovuni.

Innflutningurin frá apríl í fjør til apríl í ár var tilsamans 10,5 milliardir krónur. Vøksturin er 27 prosent.

Útflutningurin sama tíðarskeið var 10,7 millardir kr.

Innflutningurin av brennievni vaksin mest

Størsti vøksturin í innflutningtølunum er brennievni. 

Vit hava innflutt brennievni fyri tilsamans hálva aðru milliard krónur seinasta árið. Vøksturin er 625 milliónir kr. , ella 66,4 prosent.

Skipainnflutningurin er vaksin 552 milliónir kr.

Innflutningurin av maskinum og aðrari útgerð og rávøru til fiskavirking er vaksin 900 milliónir kr., ella 28 prosent.