Vinnuferðavinnan í høvuðsstaðnum skal styrkjast

Fleiri ráðstevnur og tiltøk skulu vera í høvuðsstaðnum, so vinnuferðavinnan í høvuðsstaðnum verður styrkt.

Tað er eitt av átøkunum í ferðavinnupolitikkinum, sum verður lagdur fram í Perluni í Havn seinnapartin.

Býráðið í Havn hevur samtykt nýggja ferðavinnupolitikkin.

Málið er, at Tórshavnar kommuna verður ein av bestu vinnuferðavinnubýum í Evropa.

Tað ber í sær, at fleiri útlendskar fyritøkur koma til Havnar at luttaka á ráðstevnum, fundum, ítróttakappingum og øðrum.

Fyrimunurin er, at vinnuferðandi vitja uttan fyri vanliga háárstíð, og tey leggja flest pengar eftir sær.

Roknað verður við, at stórhøllin, sum er í umbúna, fer at gera umstøðurnar uppaftur betri.

Fleiri ferðavinnuútbúgvingar

Í ferðavinnupolitikkinum verður eisini mælt til at stovna fleiri ferðavinnuútbúgvingar í Føroyum.

Í dag ber til at taka útbúgving í marknaðarførslubúskapi og tænastubúskapi.

Ferðavinnan eftirlýsir fleiri útbúgvingar, t.d. sum móttøkufólk, skrivstovuútbúgving við ferðavinnu sum sergrein, at samskipa tiltøk og samskipa gestablídni, sum fevnir um leiðslu og rakstur, tá ið umræður upplivingar, gistingarhús og ferðavinnu.

Eisini er tørvur at kanna, hvussu kokka- og tænaraútbúgvingarnar skulu skipast frameftir.

Fólk og handilsvinnan í Havn siga seg eisini eftirlýsa hugnaligari og meira livandi miðbý við matmarknaði, gøtumati, útiservering, savnandi býarrúmum, spæliplássi og øðrum virksemi annars.

26 átøk eru í ferðavinnupolitikkinum, sum hevur heitið "Fólk og ferðavinna lið um lið".

Framløgan verður í Perluni klokkan 14.