USA lovar ES gass, so tað slepst undan orku úr Russlandi

USA lovar ES gass, so tað slepst undan orku úr Russlandi
Joe Biden, forseti, og forkvinnan í ES-nevndini, Ursula von der Leyen, hava havt tíðindafund í dag
Hýrurin var góður, tá Joe Biden, forseti, og forkvinnan í ES-nevndini, Ursula von der Leyen, hildu felags tíðindafund í dag.
Mynd: Ritzau Scanpix  
 
25.03.2022 - 14:08

USA hevur givið ES lyfti um 15 milliardir rúmmetrar av jarðgassi í ár, so at ES ikki hevur fyri neyðini at fáa orku úr Russlandi.

- Russiski forsetin, Vladimir Putin, brúkar orku til at noyða og manipulera sínar grannar, og yvirskotið av inntøkunum, sum hann fær av søluni, brúkar hann til at fíggja russisku krígsmaskinuna, segði amerikanski forsetin, Joe Biden, á tíðindafundi saman við Ursulu van der Leyen, forkvinnu í ES-nevndini, í dag.

Ursula von der Leyen vísti á, at semja er um revsitiltøkini móti Russlandi, og at tiltøkini máa undan møguleikanum hjá Putin at fara í kríggj.

- Kríggið verður eitt strategiskt tap fyri Putin, sigur forkvinnan í ES-nevndini.

 

Styrkja orkusamstarvið

Ætlanin er nú, at ES og USA skulu styrkja transatlantiska orkusamstarvið.

- Vit eru samd um felags leist fyri tað, og vit seta ferð á tilgongdina at skapa trygga framtíð við reinari orku, segði Joe Biden á tíðindafundinum.

Sambært upplýsingum frá Hvítu Húsunum fer ES-nevndin at samstarva við ES-limalondini fyri at tryggja umleið 50 milliardir rúmmetrar av jarðgassi til londini innan ár 2030. 

USA fer at senda flótandi jarðgas (LNG) við farmaskipi til Evropa.

Umframt at avmarka innflutningin úr Russlandi, verður arbeitt við at minka tørvin á gassi.

Von der Leyen og Biden nevndu m.a. vetni, ravmagn og snildar orkuloysnir sum íløgu í burðardygga framtíð.

 

Avmarka orku úr Russlandi

Týska stjórnin boðar í dag frá, at hon avmarkar innflutningin av orku úr Russlandi eftir russisku innrásina.

Týska handils- og idnaðarmálaráðið hevur boðað frá, at Týskland longu í juni minkar innflutningin av olju úr Russlandi niður í helvt, og gevst at innflyta kol í heyst.

Týski vinnumálaráðharrin, Robert Habeck, ássanaði kortini, at innflutningurin av gassi er ikki so einfaldur at skerja. 

Týskland verður ikki leyst av russiskum gassi fyrr enn miðskeiðis í 2024, skrivar AP.

Er kopiera
Nýggjastu sendingar í ÚV
Hósdag 20. februar
Leitisstein 18.02.2025
188081
Hósdag 20. februar
Andarblak 20. februar 2025
188079
Hósdag 20. februar
Breddin: Friðarsamráðingar um Ukraina
188053
Hósdag 20. februar
Mono - Føroyskar perlur (2:4)
188051
Nýggjastu sendingar í SV
Mikudag 19. februar
Dagur og vika - teknmálstulkað
187990
Týsdag 18. februar
Veðrið
187962
Sunnudag 16. februar
VÍF - Kyndil, menn
187840
Sunnudag 16. februar
Guðstænasta úr Havnar kirkju
187829
Leygardag 15. februar
2. hálvfinala hjá monnum: H71 - KÍF
187825