Fyrireikar broytingar í revsilógini

Arbeiðið at fyrireika broytingar í revsilógini er byrjað, sigur Bárður á Steig Nielsen, løgmaður.

Talan er um herðingina í sambandi við revsing fyri kynslig misbrot.

Eystari landsrættur hevur nú staðfest avgerðina hjá Føroya rætti, at herðingin, sum var gjørd um kynslig misbrot í donsku revsilógini í 2016, er ikki galdandi í Føroyum.

Tað er hon ikki, tí ein greið politisk fráboðan um at herða revsingina var ikki í Føroyum.

Slík fráboðan var í Danmark, sigur Landsrætturin.

Føroyar hava sína egnu revsilóg, tí málsøkið er yvirtikið.

Herda revsingin skal eisini í føroysku revsilógina, sigur løgmaður, sum hevur biðið embætisfólk síni gera eitt uppskot um tað.

Tá uppskotið er liðugt, verður tað lagt fyri løgtingið.